A XUNTA HABILITA UNHA WEB PARA OFRECER INFORMACIÓN SOBRE AS ELECCIÓNS AO PARLAMENTO DE GALICIA DO 5 DE ABRIL

Na web estará dispoñible información sobre aspectos esenciais como o voto por correo, o calendario electoral ou preguntas frecuentes
A Xunta habilita tamén o teléfono do elector co número 900 825 520
A Xunta vén de habilitar unha páxina web (http://eleccionsgalicia2020.gal) na que está dispoñible toda a información esencial sobre as eleccións ao Parlamento de Galicia do 5 de abril.
Na web inclúese información relacionada con temas fundamentais, como o voto por correo para os residentes en España ou temporalmente no estranxeiro, e para as persoas que figuran no CERA. Nestes apartados, ademais da explicación do procedemento, poderanse descargar tamén os formularios correspondentes.
A información da páxina web tamén cobre outros aspectos útiles para a cidadanía, como os trámites co censo, os impresos electorais (para votantes, concellos ou mesas electorais) e a consulta dos colexios e mesas electorais.
Tamén están dispoñibles documentos relacionados coa lexislación vixente, estatal e autonómica; o calendario electoral coas datas sinaladas; e información de utilidade para as persoas que integren ás mesas electorais.
Para maior utilidade e comodidade, a páxina incorpora un apartado de preguntas frecuentes e un chat para consultar calquera dúbida. Tamén está dispoñible o teléfono do elector, no número 900 825 520.
Cómpre ter en conta que a web irase completando, paulatinamente e de acordo cos tempos electorais, cos novos documentos que correspondan. ​